Asa maggikan ang kaluwasan?
Luyo sa kahibalo sa mga Muslim nga nagpunay og pugus sa Islam ngadto sa mga dili-Muslim nga mao’y tinuod nga relihiyon kuno, ang Hudiyohanong Kasulatan (Tanakh) nagpahibalo na kanatu nga ang Kaluwasan sa katawhan maggikan sa mga Hudiyo o Herusalem, ug dili maggikan sa mga Arabo o Mecca. Kung ang Islam tinuod nga Abrahamnong Pagtoo, ug ang Ginoo dili mag-usab sa Iyang hunahuna, ang mga Muslim mopatalinghog gayod unta kung unsa ang gipangpangita diha sa kasulatan sa Tanakh. Si Muhamad hingpit nga hagbong sa kapasikaran sa pagkapropeta nga gilatid sa mga Hudiyohanong libro. Ang basahun sa Genesis nag-ingon nga ang Kasabotan sa Ginoo ipasukad kang Isaak, ug dili kang Ismael. Ang basahun ni Isaias nagtug-an nga ang balaod o pulong sa Dios mogula gikan sa Zion, (ang Zion usa ka bukid sa Herusalem). Gipahayag ni Hesus nga ang Kaluwasan maggikan sa mga Hudiyo sugod sa Herusalem. Si San Lukas mipamatuod nga ang Maayong balita o pulong sa Ginoo isangyaw una sa mga Hudiyo dayon sa mga Hentil. Mipamatuod pud si San Pablo nga ang Maayong balita nga nagdala sa Kaluwasan isangyaw una sa mga Hudiyo sa dili pa ang mga Hentil.
[Genesis 17:20-21] Ug mahitungod kang Ismael, ikaw akung gidungog: sa pagkatinuod panalanginan ko siya; Pabungahon ko siya ug padaghanon ko pag-ayo. Mamahimo siyang amahan sa napulu’g duha ka mga magmamandu, ug himoon ko siyang ngilngig nga nasod. Apan ipasukad ko ang akung kasabotan kang Isaak, nga ianak ni Sara kanimo niining panahona sa sunod tuig.
[Isaias 2:3] Daghang katawhan ang moabut ug moingon, “Dali, manungas kita sa bukid ni Hehoba, ngadto sa templo sa Diyos ni Hakob. Siya magatudlu kanatu sa iyang pamaagi, aron kita makalakaw sa iyang mga dalan.” Ang kasuguan mogula gikan sa Zion, ang pulong ni Hehoba gikan sa Herusalem.
[Juan 4:22] Kamong mga Samarianhon nagasimba sa wala ninyo hiilhi; kami nagasimba sa amung nahibaloan, kay ang kaluwasan maggikan sa mga Hudiyo.
[Lucas 24:47] ug ang paghinulsol alang sa kapasayloan sa mga sala isangyaw sa iyang ngalan sa tanang kanasuran, sugod sa Herusalem.
[Mga Buhat 3:22-26] Kay si Moises nag-ingon, ‘Ang Ginoo nga inyong Dios magpatindog alang kaninyo ug usa ka manalagna nga sama kanaku gikan sa inyong kaugalingong katawhan; kinahanglan nga mamati kamo sa tanan nga iyang isulti kaninyo. Si kinsa nga dili maminaw kaniya pagaputlon sa hingpit gikan sa iyang katawhan. “Sa pagkatinuod, sugod ni Samuel, ang tanang mga manalagna namulong nang daan niining mga adlawa. Ug kamo mga manununod sa mga manalagna ug sa kasabotan nga gihimo sa Dios uban sa inyong mga amahan. Miingon siya kang Abraham, ‘Pinaagi sa imong kaliwat ang tanang katawhan sa yuta mapanalanginan.’ Sa dihang gibanhaw sa Dios ang iyang suluguon, gipadala siya og una kaninyo aron sa pagpanalangin kaninyo pinaagi sa pagpatalikod sa matag usa kaninyo gikan sa daotang mga binuhatan.
[Mga Buhat 13:36-39] “Karon sa dihang si David nag-alagad sa katuyuan sa Diyos sa iyang kaugalingong kaliwatan, siya nahikatulog; gilubong siya uban sa iyang mga katigulangan, ug nadugta ang iyang lawas. Apan ang gibanhaw sa Dios gikan sa mga patay wala nakita sa pagkadunot. “Busa, akung mga higala, buut ko nga masayran ninyo nga pinaagi kang Hesus ang kapasayloan sa mga sala gisangyaw kaninyo. Pinaagi kaniya ang tanan nga nagatoo maluwas sa matag sala, usa ka pagpamatarong nga dili ninyo maangkon ilalum sa kasuguan ni Moises.
[Mga Buhat 13:45-47] Sa pagkakita sa mga Hudiyo sa panon sa katawhan, nangabubho sila. Misugod sila sa pagsupak sa gisulti ni Pablo ug nagbutangbutang ug nag-abuso kaniya. Unya si Pablo ug si Barnabas mitubag kanila nga maisugon: “Kinahanglan nga isulti una namo kaninyo ang pulong sa Dios. Tungud kay gisalikway ninyo kini ug wala kamo nag-isip sa inyong kaugalingon nga takus sa kinabuhing dayon, mipaling kami karon sa mga dili Hudiyo. Kay mao kini ang gisugu kanatu sa Ginoo: “Himoon ko usab ikaw nga kahayag alang sa mga Hentil, aron ang akung kaluwasan makaabot sa kasuukan sa kalibotan.” (Isias 49:6)
[Roma 1:16] Kay wala ko ikaulaw ang maayong balita, kay ang gahum sa Ginoo mao ang nagadala ug kaluwasan sa tanan nga nagatoo: una sa mga Hudiyo, dayon sa mga Gentil.
∼ο∼
