Ang mga magtotoo sa Islam, Saksi ni Jehovah, Iglesia Ni Cristo ug uban pang mga pundok sa antikristo kanunay mokutlu sa Juan 5:30 sa tinguha nila nga ipanghimakak ang pagkaDyos ni Hesus.
[Juan 5:30] Sa akung kaugalingon ako walay mahimo; Ako nagahukum lamang sumala sa akung nadungog, ug ang akung hukum matarong, kay ako wala mangita sa pagpahimuot sa akung kaugalingon kundili kaniya nga nagpadala kanaku.
TUBAG: Ang tubag sa maong pangutana anaa sa tudling mismo. Sumala sa mamatikdan nimo sa tudling sa ibabaw, adunay hinungdan ngano si Hesus walay mahimo, kini tungud kay siya nagtinguha sa pagpahimuot sa Amahan nga nagpadala kaniya. Sa tataw, wala kini magpasabut nga wala siyay mahimo kay makahimo siyag mga milagro ug bisan sa pagbanhaw ug mga patayng lawas. Ang iyang gipasabut mao nga ang tanan niyang mga buhat ug mga pulong nahiuyon sa kabubut-on sa Amahan. Kung gusto nimong pahimut-an ang imong yutan-ong amahan, kinahanglang sundon nimo ang iyang tambag ug buhaton ang iyang kabubut-on, ug kana ang gibuhat ni Hesus. Mahimo nimong lapason ang mandu sa imong amahan kutub sa imong gusto, apan imong gipili ang pagsunod niini tungud kay gihigugma nimo siya, ug gusto nimo nga pahimut-an siya. Sa ubus mao ang mga tudling nga nag-ingon nga si Hesus nagbuhat sa kabubut-on sa Amahan;
[Juan 6:38] Kay nanaug ako gikan sa langit, dili sa pagbuhat sa Akung kaugalingong kabubut-on, kundili sa pagbuhat sa kabubut-on sa nagpadala Kanaku.
[Juan 14:10] Wala ka ba motoo nga ako anaa sa Amahan ug ang Amahan ania kanaku? Ang mga pulong nga akung gisulti kaninyo wala ko isulti sa akung kaugalingong awtoridad, kundili ang Amahan nga nagpuyu kanaku mao ang nagbuhat sa iyang mga buhat.
[Juan 5:19] Busa si Hesus mipatin-aw, “Sultihan ko kamo sa tinuod, ang Anak walay mahimo sa iyang kaugalingon. Iyang gibuhat lamang ang iyang nakita nga gibuhat sa Amahan. Bisan unsa ang gibuhat sa Amahan, gibuhat usab sa Anak.
BUYAG: . . . Ako anaa sa Amahan ug ang Amahan ania kanaku. . . ang Amahan nga nagapuyu kanaku nagabuhat sa iyang mga buhat . . . Bisan unsa ang gibuhat sa Amahan, gibuhat usab sa Anak. Kini nga mga pahayag nagpasiugda nga adunay pagkausa sa Amahan ug ni Jesus. Sa pagkatinuod si Hesus miingon nga Siya ug ang Amahan usa ra (Juan 10:30).
Ang usa pa ka hinungdan kung nganong miingon si Hesus nga wala siyay mahimo mao nga gibayaw o gihimaya niya ang iyang Amahan. Kung imong ibayaw ang usa ka tawo, kinahanglan ipaubus nimo ang imong kaugalingon ngadto kaniya. Ang Amahan misugu kang Hesus sa paghimaya Kaniya (Salmo 50:15), ug agig balos, himayaon usab sa Amahan ang Anak (Juan 12:28).
Read: The Father and the Son glorified each other.
Ang Pulong (kalag ni Hesus) misulod sa kalibotan aron sa pagdala sa Bag-ong Kasabotan, sa pagtukod sa Iglesia o Gingharian sa Dios, sa pagpahayag sa Iyang balaang mga pulong, sa pagpakita og mga kahibulongan ngadto sa mga tawo, sa pagluwas sa katawhan pinaagi sa hingpit nga pagsunod sa balaod, ug sa pagbutang sa iyang kaugalingon isip usa ka panig-ingnan sa mga tao kung unsaon niila pagkinabuhi nga may kalabotan sa Diyos. Gibuhat ni Hesus kining tanan sa pag-alagad sa Amahan.
∼ο∼