“Busa si Hesus sa iyahang tawhanong lawas, kabahin siya sa katawhan nga gidid-an sa Ginoo sa pagkasayod sa tukmang takna sa Kataposang Adlaw.”
Gipasanginlan nga tudling:
[Marcos 13:32] Apan mahitungod nianang adlawa ug taknaa walay usa nga nasayod, bisan pa ang mga manolonda sa langit, bisan ang Anak, kundili ang Amahan lamang.
TUBAG: Si Hesus mipahayag nga siya nanaog gikan sa Langit aron lamang sa pagbuhat sa kabubut-on sa Amahan [Juan 6:38]. Wala siya mianhi sa Yuta aron sa pagbuhat sa iyang kaugalingong kabubut-on. Buut ipasabut, mahimo ni Hesus ang bisan unsa, ugaling, gisunod niya ang kabubut-on sa Amahan. Siya adunay daghang tahas nga gisangon sa Amahan kaniya sa pag-anhi sa kalibutan; siya gitudlung tagluwas o tagpaputli sa kalibutan, tagpamatuod sa balaod, tagdala sa bag-ong Tugon, tagtukod sa Gingharian sa Ginoo o Iglesia, ug usa ka manalagna o mamumulong sa Amahan. Isip usa ka manalagna o mamumulong sa Amahan, siya misulti lamang sa unsay gisugu sa Amahan nga iyang litukon. Atong basahon ang giingon ni Hesus;
[Juan 12:49] “Kay Ako wala magsulti sa Akung kaugalingong pagbuut, kondili ang Amahan mismo nga nagpadala Kanaku nga naghatag kanaku ug baod kon unsay akung isulti ug unsay akung litukon.
Gisulti kana ni Hesus ubus sa kabubut-on sa Amahan nga nagsugu kaniya sa paghimaya Kaniya. Kung imong gihimaya ang usa ka tawo nagpasabut kana nga imong gidayeg, gibayaw, gipasidunggan, gitahod, o gialagaran siya. Ug mao kana ang ginahimo ni Hesus ngadto sa Amahan, palihog sa pag basa;
BUYAG: Niining tudlinga nangatarongan si Hesus nganong mihangad Siya sa langit ug nagpasalamat sa Amahan, kini aron ang mga tawo motoo nga siya gipadala sa Amahan. Niining buhata, gihimaya ni Hesus ang Amahan sa mga mata sa katawhan nga nagsud-ong kaniya.
Agi’g sukli, ang Amahan naghimaya kang Hesus. Ang Amahan ug ang Anak naghimaya sa usag usa. Nganong gihimaya man sa Amahan si Hesus kung dili siya balaan? Palihog basaha;
[Juan 13:31-32] Si Hesus miingon, “Karon ang Anak sa Tawo gihimaya, ug ang Ginoo gihimaya diha Kaniya; kung ang Ginoo gihamaya diha Kaniya, ang Ginoo usab magahimaya Kaniya diha sa Iyang kaugalingon, ug magahimaya Kaniya dihadiha.
[Juan 17:1] Si Hesus misulti niini nga mga butang; ug miyahat sa Iyang mga mata ngadto sa langit, Siya miingon, “Amahan, miabut na ang takna; himayaa ang imong Anak, aron ang Anak maghimaya kanimo,
Si Hesus usab miangkon nga siya ug ang Amahan usa ra [Juan 10:30 & Isaias 9:6], nga siya anaa sa Amahan ug ang Amahan nagpuyu diha kaniya;
[Juan 14:10-11] Wala ba kamo motoo nga ako anaa sa Amahan ug ang Amahan ania kanaku? Ang mga butang nga akung gipanulti kaninyo dili gikan kanaku. Ang Amahan nagpuyu kanaku, ug siya nagbuhat sa iyang kaugalingong buluhaton. Toohi ako kung moingon nga ako anaa sa Amahan ug ang Amahan ania kanaku. O toohi ako tungud sa mga milagro nga akung nahimo.
Ang nahibaloan sa Amahan, nahibaloan usab sa Anak kay usa ra sila sa kinaiya. Bisan unsa’y gibuhat sa Amahan, gibuhat usab sa Anak [Juan 5:19]. Nasayod si Hesus sa tukmang Takna, apan gililong niya kini tungud sa pagsunod sa kabubut-on sa Amahan. Sa pagkatinuod, dili lamang siya nahibalo kung unsay mahitabu human sa Adlaw sa Pagbangotan, siya pud ang moabut nga may ngilngig nga gahum. Siya miingon sa Marcos 13:24-27;
24 Apan nianang mga adlawa, human sa pagbangotan, ang adlaw mongitngit, ug ang bulan dili mohatag sa iyang kahayag,
25 Ug ang mga bitoon sa langit mangahulog, ug ang mga gahum sa kalangitan mangauyog.
26Ug unya ilang makita ang Anak sa Tawo nga motunga sa mga panganod uban ang ngilngig ng gahum ug himaya.
27 Ug unya iyang ipadala ang iyang mga manolonda, ug pagatigumon ang iyang mga pinili gikan sa upat ka hangin, gikan sa kinatumyan sa yuta hangtod sa kinatumyan sa langit.
Si Hesus Ginoo sa espiritu ug tawo sa lawas. Sa iyang tawhanon nga kinaiya, siya nag-ampu sa Amahan tungud kay kana buluhaton man sa tawo. Sa pikas nga bahin, sa iyang balaanong kinaiya, iyang gidawat ang pagsimba gikan sa mga tawo [Lucas 24:52]. Dili alang sa mga tawo ang pagkasayod sa tukma nga takna nga gitakda sa Ginoo [Mga Buhat 1:7]. Busa si Hesus sa iyang tawhanong lawas, kabahin siya sa katawhan nga gidid-an sa Ginoo sa pagkasayod sa tukmang takna sa Kataposang Adlaw.
Dugang pa, handurawa ang kahimtang kung sultihan sa Ginoo ang katawhan sa tukmang takna sa Adlaw sa Panudya, unsay mahitabu? Tataw nga adunay dakung kaguliyang nga mahitabu sa bisperas sa maong makatalagmanong Adlaw. Gihulagway ni Hesus ang Kataposang Adlaw nga ingon sa labing makalilisang nga yugtu sa mga tawo. Ang mga tawo mokagiw ngadto sa mga langub ug mga lungag sa mga pangpang, gumikan sa kalisang [Isaias 2:21]. Ang mga bitoon mangahulog gikan sa langit, ug ang mga gahum sa kalangitan mangatay-og [Mateo 24:29], ang adlaw mohunong sa pagsidlak, ug ang yuta matabonan sa kangitngit. Mao pud sa tukmang takna sa atung kamatayon, kinahanglang ililong kini sa Ginoo kanatu aron dili kita mataranta ug malisang sa maong takna. Dugang pa, gituyu pud sa Ginoo nga ililong kining butanga gikan kanatu aron sa pagsulay sa atung pagtuo diha Kaniya.
∼ο∼
BASAHON PUD KINI: Kung si Hesus Ginoo, nganong Siya adunay Sinugdanan?