Ang pagkahimugsu ni Hesus mao ang pagsulod sa Ginoo sa kalibotan diha sa tawhanong dagway sumala sa gitagna ni propeta Isaias, siya mipahayag;
[Isaias 9:6] Kay alang kanatu ang usa ka bata natawo, alang kanatu ang usa ka anak nga lalake gihatag, ug ang kagamhanan igapatong sa iyang mga abaga. Ug siya pagatawgon og Kahibulongang Magtatambag, Dios nga Gamhanan, Amahan nga Walay Kataposan, Prinsipe sa Pakigdait.
[Isaias 7:14] Busa ang Ginoo na mismo ang mohatag ug timailhan kaninyo. Ug mao kini ang timailhan: Magsabak ang usa ka batan-ong babaye ug manganak siyag lalaki, ug nganlan niya kini og ‘Emmanuel (ang Dios uban kanatu).
Mga 700 ka tuig sa wala pa si Hesus, gitagna ni propeta Isaias ang pag-abut sa Anak. Siya matawo pinaagi sa usa ka ulay nga babaye, ug tawgon nga Gamhanan nga Diyos o walay kataposang Amahan. Ang mga panagna sa itaas natuman diha kang Maria, ang anghel Gabriel miingon kaniya;
[Lucas 1:30-32] Ug ang manolunda miingon kaniya, “Ayaw kalisang, Maria, kay naangkon mo ang kahimuot sa Dios. Ug tan-awa, magasamkon ikaw ug igaanak mo ang usa ka bata nga lalaki, ug siya imong paganganlan si Jesus. Siya mahimong bantugan ug pagatawgon nga Anak sa Labing Halangdon; ug kaniya igahatag sa Ginoong Dios ang trono sa iyang amahan nga si David,
Ang unang magtiayon nahulog sa sala, mao nga ang kamatayon nakasulod sa kalibotan. Ang katawhan nahimulag gikan sa himaya sa Diyos. Ang Espirito Santo nga maoy nagsaput ug naghatag kanila sa kinabuhing dayon nahanaw gikan kanila. Ang hingpit o walay sala nga tawo lamang ang makasul-ub sa saput sa kinabuhing dayon. Ang Ginoo nangita og usa ka hingpit nga tawo taliwala kanatu aron mahimong manluluwas sa katawhan, apan walay usa nga iyang nakaplagan [Isaias 59:16 & Roma 3:10]. Tungud sa Iyahang dakung gugma, gibutang sa Ginoo ang buhat sa pagluwas sa Iyahang mga kamut. Ang tawo mao’y namatay tungud sa sala, busa ang tawo usab ang makabangon kaniya gikan sa pagkapatay. Mao kini ang hinungdan ngano nga nagpabarog ang Dyos og usa ka tawo, ug nagpagawas og pulong o espiritu gikan kaniya, ug gibutang niining maong tawo [Deuteronomio 18:18, Isaias 61:1, Lucas 4:18, ug Juan 14:10]. Ang tawhanong lawas lamang ni Hesus ang adunay sinugdanan, apan ang Iyahang Espirito walay sinugdanan ug kataposan, tungud kay kini usa man ka bahin sa espirito sa Ginoo. Gani, si Hesus mipahayag nga Siya walay sinugdanan ug katapusan;
[Juan 8:58] Si Jesus miingon kanila, “Sa pagkatinuod, sa pagkatinuod, magaingon ako kaninyo, nga sa wala pa matawo si Abraham, AKO NA.”
[Juan 8:23-24] “Kamo gikan sa ubus; Ako gikan sa itaas. Kamo iya niining kalibutana; Ako dili iya niining kalibutana. Ako miingon kaninyo nga kamo mamatay sa inyong mga sala; kung dili kamo motoo nga AKO MAO SIYA, mangamatay gayud kamo sa inyong mga sala.”
[Juan 13:19] “Gisultihan ko kamo karon sa wala pa kini mahitabu, aron nga kung mahitabu na, motoo kamo nga AKO MAO AKO.
Giangkon o gigamit ni Hesus ang ngalan sa Ginoo nga gihatag Niya kang Moises sa Juan 8:23-24 ug Juan 13:19, Itandi kini nga mga bersikulo sa Exodo 3:13-14 ug Isaias 43:10;
[Exodo 3:13-14] “Kon ako moadto sa katawhan sa Israel ug moingon kanila, ‘Ang Diyos sa inyong mga katigulangan nagpadala kanako nganhi kaninyo,’ ug sila mangutana kanako, ‘Kinsa ang iyang ngalan?’ unsay akong isulti kanila?” Ang Dios miingon kang Moises, “AKO MAO AKO.” Ug siya miingon, “Isulti kini sa katawhan sa Israel, ‘AKO MAO ang nagpadala kanako nganhi kaninyo’.
[Isaias 43:10] “Kamo mao ang akong mga saksi,” miingon si Jehova, “ug ang akong alagad nga akong gipili, aron kamo makaila ug motoo kanako ug makasabut nga AKO MAO SIYA. Sa wala pa ako walay dios nga nahimo, ni adunay usa nga sunod kanako.
“AKO MAO, AKO MAO SIYA, o AKO MAO AKO”, mao ang titulo sa Diyos nga gihisgotan sa Bibliya. Kini nagsulti sa Iyang kaugalingon nga pagkaanaa; nga Siya walay sinugdanan ug kataposan, nga Siya mao ang Una ug ang Kataposan, sa gihapon mao ra. Ang manluluwas kinahanglang hingpit nga tawo, mao nga si Hesus bisan og Ginoo usab, wala mogamit sa iyang pagkaGinoo alang sa iyang kaayohan (Filipos 2:6), hinuon iyang gigamit ang iyang pagkatawhanon sa pagtuman sa balaod sa hingpit. Kung si Hesus migamit sa iyang gahum sa paglapas sa balaod, sa unsang paagi siya matawag nga walay sala? Sa unsang paagi siya mamahimong matarong? Ug sa unsang paagi ang iyang makaluwas nga halad alang sa katawhan mamahimong balido?
∼ο∼
BASAHA PUD KINI: Nganong nag-ampu si Hesus kung Siya Ginoo?