Usa niadtong mga adlawa miadto si Hesus sa bukid aron sa pag-ampu, ug nagpalabay sa kagabhion nga nag-ampu sa Ginoo.
Lukas 6:12
TUBAG:
Ang Ginoo espirito (Juan 4:24), ug mahimo Niyang ikatag ang Iyang kaugalingon (Joel 2:28). Sa dihang si Adan ug Eba nahulog sa lit-ag ni Satanas, nawala ang ilang kinabuhing dayon tungud kay ang bayad sa sala mao ang kamatayon (Roma 6:23). Ang himaya nga nagasal-ub sa ilang mga lawas nawala, pagkahinla, sila nakahiagom sa pagkadaot sa lawas ug kamatayon (Genesis 2:17). Ug tungud kay mga kaliwat man kita nila, napanunod natu ang ilang kahimtang, sama kanila nag-antos usab kita sa pagkadaot sa lawas ug kamatayon. Ang lunsay o wala’y sala nga tawo lamang ang makabaton og kinabuhing dayon, apan ang tanan aduna’y mga sala, busa ang katawhan nag-ungaw sa pagkalaglag. Nangita ang Ginoo og usa ka tawo nga mao’y mamahimong hinungdan ngano nga dili Niya laglagon ang katawhan, apan wala Siyay nakit-an (Isaias 59:16 & Ezekiel 22:30). Apan tungud kay gihigugma pag-ayo sa Dios ang kalibotan, nag-umol Siya og laraw sa kaluwasan. Mibuga Siya og pulong o espirito, dayon gihimo kini nga Iyang anak pinaagi sa usa ka mandu (Salmo 2:7). Ang hinungdan ngano nga ang Anak sa Dios gipaila mao ang pagpukan sa mga buhat sa yawa (1 Juan 3:8). Kung wala pa ang sala, wala’y anak nga gipaila. Ang pulong, espirito, o ang anak sa Dios misulod sa kalibotan pinaagi sa tawhanong paghimugsu (Juan 6:38, Juan 1:14, ug Mateo 1:16). Nganong tawhanong paghimugsu? Tungud kay ang kamatayon miabut pinaagi sa usa ka tawo, busa ang pagkabanhaw sa mga patay magakigan usab pinaagi sa usa ka tawo (1 Corinto 15:21). Giharong ni Hesus ang iyang mapintas nga kapalaran ug gituman ang kasuguan sa hingpit maski pa sa kamatayon sa krus. Ang tuyu sa Dios mao nga ang katawhan makabaton ug usa ka lunsay o walay sala nga tawo aron sila maluwas gikan sa kalaglagan.
Nganong nag-ampu si Hesus? Tungud kay mao kana ang usa sa mga butang nga kinahanglan buhaton sa usa ka tawo ilalum sa kasuguan _ang pag-ampu. Kung si Hesus wala nag-ampu ug hinoon migamit sa iyang pagkaGinoo, dili siya mamahimong usa ka tawong walay sala tungud kay iyang gilapas ang kasuguan. Mao nga, kinahanglan ni Hesus nga magpuyu sa kalibotanong kinabuhi ug harongon ang iyang kapalaran gamit ang iyang pagkatawo. Dugang pa, siya nangatarongan ngano nga siya nag-ampu, aron kini masaksihan sa mga tawo sa ingon modayeg sila sa Amahan nga nagpadala kaniya (Juan 11:41-42). Sa laing pagkasulti, gibayaw ni Hesus ang Amahan sumala sa gipangayu sa balaod _nga mao ang paghimaya sa Ginoo (Salmo 50:15 & Juan 17:4). Kung imong ibayaw ang imong isigkaingon, kinahanglang ipaubus nimo ang imong kaugalingon ngadto kaniya, ug dayegon nimo siya.
∼ο∼
BASAHA USAB:
Nganong namatay si Hesus kung Siya Ginoo?