TUBAG:
Si Hesu-Kristo namatay alang sa atung mga sala, gilubong, ug nabanhaw sa ikatulo ka adlaw sumala sa Kasulatan. Si Hesus usa ka tawo nga wala'y sala apan nagdala sa mga sala sa katawhan, busa siya sa iyang kaugalingon mipailawum usab sa kalibotanong kapintas nga namugna sa pagsupak sa kasuguan. Iyang gitahan ang iyang kaugalingon ngadto sa Ginoo ingong makasasalang katawhan nga gipahamtangan ug silot sa kamatayon. Si Propeta Isaias nagtagna mahitungod sa nagbangotan nga Mesiyas, ang manluluwas nga mopas-an sa sala sa daghan, ug modawat sa ilang silot;
- [Isaias 53:4-6] Sa pagkatinuod gidawat niya ang atung mga kaluyahon ug mipas-an sa atung mga kasubu; apan giisip natu siya nga gihampak sa Dios, gihampak ug gisakit. Apan siya gisamaran tungud sa atung mga kalapasan, Gidugmok siya tungud sa atung mga kasal-anan; ang silot nga nagdala kanatu og kalinaw diha Kaniya, ug pinaagi sa Iyang mga labud kita nangaayo. Kitang tanan sama sa karnerong nahisalaag, ang matag usa mitalikod sa iyang kaugalingong dalan; ug gipapas-an sa Ginoo kaniya ang pagkadautan natung tanan.
- [Isaias 53:11-12] Human sa kasakit sa Iyang kalag, Siya makakita sa kahayag sa kinabuhi ug matagbaw. Pinaagi sa iyang kahibalo ang akung matarong nga Alagad magapamatarong sa daghan, ug siya magapas-an sa ilang mga sala. Busa hatagan ko siya ug usa ka bahin uban sa mga ngilngig, ug siya magabahin sa mga linungkab uban sa mga kusgan, tungud kay gibubu niya ang iyang kinabuhi ngadto sa kamatayon, ug Siya giihap uban sa mga malapason. Apan gipas-an niya ang sala sa kadaghanan ug naghimo sa pangamuyu alang sa mga malapason.
- BUYAG: Ang mga garay sa ibabaw nagtagna sa kapalaran ni Hesus, nga mamahimong tagdala sa kasal-anan sa katawhan ug tagdawat sa ilang silot. Siya mamahimong tigpataliwala tali sa Ginoo ug sa makasasalang katawhan. Si Hesus bisag Ginoo sa kalag, wala mogamit sa iyang balaang gahum sa iyahang pabor, hinuon nagpakita siyag hilabihang pagkamapaubsanon ug gigamit ang iyang pagkatawo sa paghiagum sa kalibotanong kasakitan. Palihug panumbalinga ang mga garay sa ubus;
- [Filipos 2:5-8] Batoni ninyo kini nga panghunahuna nga iya usab ni Kristo Hesus: Bisan ang kinaiya sa Dios anaa kaniya, wala niya hunahunaa ang iyang pagkatupong sa Dios. Kundili gipaubus niya ang iyang kaugalingon pinaagi sa paghupot og kinaiya sa usa ka alagad, nagpakaingon siya sama sa mga tawo. Sa dihang nahimo siyang usa ka tawo, gipaubus niya ang iyang kaugalingon, mituman sa Dios hangtod sa kamatayon, bisan pa ang kamatayon sa krus.
Si Hesus adunay gahum sa iyang kinabuhi apan gituyu niya kini pagtugyan aron matubus ang katawhan, sumala sa iyang giingon;
- [Juan 10:18] Walay makapatay kanaku kundili ko kini itugot. Apan kabubut-on ko nga ihatag ang akung kinabuhi. Akung pagbuut ang paghatag niini, ug pagbuut ko usab ang pagbawi niini. Mao kini ang giingon kanaku sa Amahan.”
Human gilayon sa pagkahulog sa sala sa unang tawo, ang Dios nag-umol ug usa ka laraw sa pagpukan sa buhat ni Satanas. Miingon siya sa Bitin nga si Satanas;
- “Magbutang ko og kaligutgut tali kanimo ug sa babaye, ug tali sa imong binhi ug sa iyang binhi; bunalan niya imong ulo, ug samaran nimo ang iyang tikod” [Genesis 3:15].
- BUYAG: Kining gisaad nga binhi natuman diha kang Hesus nga natawo sa usa ka babaye (Maria). Ang hinungdan ngano nga ang Anak gipadayag mao ang pagpukan sa buhat sa yawa pinaagi sa iyang kamatayon. Aron diha sa kamatayon ni Hesus, iya kitang maluwas gikan sa gahum sa kamatayon nga gipahiagum ni Satanas kanatu. Palihog basaha;
- Ang nagabuhat sa pagpakasala iya sa yawa, kay ang yawa nagpakasala sukad pa sa sinugdanan. Mao kini ang hinungdan nga ang Anak sa Dios gipadayag, aron sa pagpukan sa mga buhat sa yawa [1 Juan 3:8].
- Tungud kay ang mga anak adunay unud ug dugu, siya usab nakig-ambit sa ilang pagkatawhanon aron pinaagi sa iyang kamatayon mabuntog niya ang nagkupot sa gahum sa kamatayon nga mao ang yawa, ug mapalingkawas niya ang mga naulipon sa tibuok nilang kinabuhi tungud sa ilang kahadlok sa kamatayon [Hebreohanon 2:14-15].
Ang bayad sa sala mao ang kamatayon [Roma 6:23], apan ang tanan nga mga tawo makasasala [Roma 3:23-24], busa ang tanan nga mga tawo gitakdang mamatay sa lawasnon ug kalagnon. Ang putli o walay sala nga tawo lamang ang makasulod sa kaharian sa Dios, apan unsaon man natu pagkaputli kung kita makasasala na sukad pa sa pagkahimugsu [Salmo 58:3]? Ang usa ka makasasala dili makasumpay pag-usab ngadto sa himaya sa Dios pinaagi sa iyang kaugalingon. Nangita ang Dios og wala'y sala o balaan nga tawo nga mamahimong hinungdan nga dili Niya laglagon ang katawhan, apan wala Siyay nakit-an [Ezekiel 22:30 & Isaias 59:16]. Tungud kay gihigugma pag-ayo sa Dios ang kalibotan [Juan 3:16], mibuga Siya og pulong o espirito, ug iya kining gihimong Iyang ‘anak’ pinaagi sa mandu [Salmo 2:7]. Ang Anak, pulong, o espirito sa Dios misulod sa kalibotan pinaagi sa tawhanong paghimugsu [Isaias 7:14]. Ug ang nahimugsong tawo mituman sa kasuguan sa walay kapakyas bisan pa man diha sa kamatayon sa krus. Tungud sa panubus nga buhat ni Hesus, ang katawhan nakabaton na og tawong walaý sala, busa kini nakahatag og hinungdan sa Ginoo aron dili Niya laglagon sila. Si Hesus milihok sama sa usa ka karnero nga gihalad aron pagwagtang sa mga sala sa kadaghanan. Iyang gipas-an ang atung mga sala ug namatay alang kanatu aron nga pinaagi kaniya kita mamahimong matarong ug mahimong tul-id sa mga mata sa Dios [Roma 3:25-26]. Pinaagi sa pag-antos ug kasakit ni Hesus, ang kasuku sa Amahan nahupay;
- Human sa pag-antos sa iyang kalag, makakita siya sa kahayag ug matagbaw. Ang akung matarong nga alagad magapamatarong sa daghan pinaagi sa kahibalo sa iyang kaugalingon; ug siya magapas-an sa ilang mga kasal-anan [Isaias 53:11].
Gituman ni Hesus ang kabubut-on sa iyang Amahan, ang iyang kapalaran gipahibalo nang daan sa Kasulatan libohan ngadto sa gatosan ka tuig sa wala pa siya matawo. Gani, ang iyang kataposang pulong mao ang, “natapus na” [Juan 19:30], nga nagtumbok sa katumanan sa mga panagna mahitungod kaniya. Palihog hilinga kining pakigpulong ni Hesus ngadto sa iyang mga apostoles human sa iyang pagkabanhaw;
- “Kini mao ang akung mga pulong nga akung ginasulti kaninyo samtang ako uban pa kaninyo, nga ang tanang mga butang nga nahisulat mahitungod Kanaku sa Balaod ni Moises ug sa mga Manalagna ug sa mga Salmo kinahanglang matuman” [Lucas 24:44]
Ang katawhan nahimulag sa Ginoo hinungdan nga nawala ang ilang kinabuhing dayon. Ang ‘pagkawalay sala’ nagkahulogan og ‘kinabuhing walay kataposan’ samtang ang ‘pagkamakasasala’ nagkahulogan og ‘kamatayon’. Mao nga kita patay na tungud sa sala, apan pinaagi sa pagkabanhaw ni Hesus kita usab mabanhaw, ang atung buhaton mao lamang ang pagtoo sa iyahang pangluwas nga buhat ug pagsunod sa iyahang kabubut-on.
Ngano nga ang espirito sa Ginoo nagsul-ub og tawhanong lawas aron maluwas kita? Ang tubag mao;
- “Kay sanglit pinaagi sa tawo miabut ang kamatayon, pinaagi sa tawo usab maggikan ang pagkabanhaw sa mga patay” [1 Corinto 15:21]
- Kay ingon nga pinaagi sa pagkasupakan sa usa ka tawo ang daghan nahimong mga makasasala, sa ingon usab pinaagi sa pagkamasinugtanon sa usa ka tawo ang daghan mahimong matarong. [Roma 5:19]
Usa sa hinungdan maong kinahanglang mamatay si Hesus sa lawas mao nga ang iyang kalag makaadto sa mga kalag sa mga nangamatay sa unang panahon nga nabilanggo sa espidno aron sila iyang walehan;
- [1 Pedro 3:18-19] Kay si Kristo usab nag-antos sa makausa alang sa tanan alang sa mga sala, ang matarong alang sa mga dili matarong, aron sa pagdala kaninyo ngadto sa Ginoo. Gipatay siya sa lawas apan gibuhi sa Espirito, kinsa miadto usab siya ug nagwali sa mga espiritu sa bilanggoan.
Mapatay ba ang Diyos? Ang tawhanong lawas lamang ni Hesus ang gipatay, apan ang iyang espirito wala namatay. Maski kita nga mga yanong tawo, dili makapatay si Satanas sa atung mga espirito. Ang Dios lamang ang makapatay sa espirito maski ang espirito ni Satanas;
- [Mateo 10:28] Ayaw kamo kahadlok niadtong makapatay sa lawas apan dili makapatay sa kalag. Hinunoa, kahadloki ang Usa nga makalaglag sa kalag ug lawas didto sa impiyerno.
Ang Amahan ba dili makiangayon pinaagi sa pagtugot kang Hesus nga mapatay? Dili, kay Iyang gibayaw si Hesus ngadto sa kinatas-ang dapit agi'g bugti;
- [Salmo 89:27] “Ug itudlu ko siya nga akung kamagulangan, ang labing halangdon sa mga hari sa yuta”
- [Isaias 52:13] “Tan-awa, ang Akung Alagad molihok nga maalamon; Siya iisa ug ituboy ug ibayaw pag-ayo”
- [Hebreohanon 2:9] “Apan atung nakita si Hesus nga gihimong ubus ug diyutay kay sa mga manolonda, karon gipurongpurongan sa himaya ug dungog tungud kay Siya nag-antos sa kamatayon, aron nga pinaagi sa grasya sa Dios makatilaw siyag kamatayon alang sa tanan.”
- [Filipos 2:9-11] Busa gibayaw siya sa Dios ngadto sa kahitas-an ug mihatag Kaniya sa ngalan labaw sa tanang mga ngalan, nga sa ngalan ni Jesus ang tanang tuhod moluhod, sa langit ug sa yuta ug sa ilalum sa yuta, ug ang matag dila magasugid nga si Hesu-Kristo mao ang Ginoo, sa himaya sa Dios nga Amahan.
∼ο∼
BASAHA USAB: Kung si Hesus Ginoo, nganong wala Siyay mahimo?