Apan kinsa ang makahimo sa pagtukod og usa ka balay alang Kaniya, sanglit ang mga langit, bisan ang kinatas-ang mga langit, dili man makaarang Kaniya? Nan kinsa man ako, nga magtukod alang Kaniya og usa ka balay, gawas sa usa ka dapit nga sunoganan sa mga halad sa iyang atubangan?
Ang Ginoo usa ka espiritong kinaiyanhon, ug kini dakuay kaayo o haluag, nga ang tanang kalangitan dili makasapar sa Iyang gidak-on. Kini ang hinungdan ngano nga nakita o nahibaloan sa Ginoo ang matag-butang tungud kay ang espirito Niya milukup sa kalangitan. Sa pagkatinuod, ang espirito sa Ginoo mao ang nagsapnay sa tanang butang sa Kalukupan. Sa ubus mao ang mga tudling sa Bibliya nga naghulagway kung unsa kahaluag ang gidak-on sa Ginoo.
[1 Mga Hari 8:27] “Apan mopuyo ba gayud ang Ginoo dinhi sa yuta? Ang langit, bisan ang kinatas-ang langit, dili man gani makasapar sa imong gidak-on. Unsa pa kaha kining temploha nga akung gitukod?
[2 Kronika 2:6] Apan kinsay makahimo sa pagpatukod ug templo alang Kaniya nga dili man gani siya maarang sa labing habog nga mga kalangitan! Busa kinsa man ako nga mopatukod ug templo nga alang Kaniya? Ang mahimo ko lang mao ang pagtukod ug dapit nga sunoganan sa mga halad diha sa iyang presensya.
[2 Kronika 6:18] “Apan mopuyu ba gayod ang Diyos dinhi sa yuta uban sa mga tawo? Ang mga langit, bisan gani ang kinatas-ang langit, dili man makasapar sa imong gidak-on. Unsa pa kaha kining temploha nga akung gitukod!
[Isaias 66:1] Mao kini ang giingon sa Ginoo, “Ang langit mao ang akung trono, ug ang kalibotan mao ang tungtonganan sa akung mga tiil. Busa unsang matanga sa balay ang inyong tukoron alang kanaku? Unsang matanga sa dapit ang inyong papahulayan kanaku?
[Jeremias 23:24] Walay tawo nga makatagu sa sekretong dapit nga dili ko makita. Wala ba kamo masayod nga anaa ako bisan asa sa langit ug sa yuta? Ako, ang Ginoo, ang nagaingon niini.
[Habakuk 3:3] “Ang Dios miabot gikan sa Teman, Ang Labing Balaan gikan sa bukid sa Paran. Ang iyang himaya milukup sa kalangitan ug ang mga pagdayeg mipunu sa kalibotan.”
[Mga buhat 7:49] ‘Ang langit mao ang akung trono, ug ang kalibotan mao ang tongtongan sa akung mga tiil. Busa unsa bang matanga sa balay ang inyong himuon alang kanaku? Asang dapita ako makapahulay?
[Efeso 1:23] nga mao ang iyang lawas, ang kahingpitan niya nga mao usab ang naglukup sa tanan
[Efeso 4:10] Ug siya nga mikunsad mao usab ang mikayab sa ibabaw pa sa kalangitan aron malukup niya ang tanan.
[Hebreohanon 1:3] Ug Siya mao ang silaw sa Iyang himaya ug ang tukma nga representasyon sa Iyang kinaiya, ug nagsapnay sa tanang mga butang pinaagi sa pulong sa Iyang gahum. Sa dihang nahimo na niya ang paghinlu sa mga sala, milingkod siya sa tuong kamut sa Halangdon sa kahitas-an,
[Hebreohanon 4:13] Walay makatagu gikan sa Ginoo; ang tanan makita niya ug dayag gayud sa iyang panan-aw, ug kaniya kita mohatag ug husay sa atung mga binuhatan.
∼ο∼