Adunay higayon sa kinabuhi nga ang tanan mahimong mausab dihadiha.
Usahay, mahitabu kini pinaagi lamang sa usa ka panagtabi. Usahay, pinaagi sa usa ka wala damhang higayon. Usahay, kalit lamang moabli ang usa ka pultahan human sa katuigan nga paghulat, pakigbisog, ug pag-alindasay kung moabut pa ba gayud ang imong panahon.
Kanang hugnaa tingali molungtad lamang og usa ka takna—apan ang usa ka ‘takna sa swerte’ mahimong makausab sa tibuuk ‘mong kinabuhi.
Wala Pa Nahuman ang Imong Sugilanon
Malagmit nag-agi ka karon og usa ka lisud nga kahimtang. Naningkamot pag-ayo apan giming ra ang imong nakab-ot nga kausaban. Gisulayan na nimo sa subli ug subli, apan padayon gihapon ang mga kapakyasan ug kasagmuyu.
Hayan nakapangutana ka sa imong kaugalingon, “Kanus-a man moabut ang akung higayon?”
Ayaw paglunga.
Tungud lamang kay ang kalamposan wala pa makab-ot, wala nagpasabut nga dili na gayud kini mahitabu. Bisan tood dili nimo makita ang umaabut, wala nagpasabut nga walay nagpaabut kanimo sa unahan.
Wala pa nahuman ang imong sugilanon.
Tingali adunay usa pa ka takna nga naghulat kanimo, usa ka takna diin motungha ang usa ka oportunidad nga may makaila ug makahatag og bili sa imong katakus, diin ang usa ka suliran makapalag ra gayud og kasulbaran, ug diin ang usa ka paghukum makausab sa padulngan sa imong kinabuhi.
Pangandam Alang sa Imong Takna sa Swerte
Inig abut sa maong higayon, kinahanglang andam ka.
Ayaw usiki ang imong mga adlaw sa paghulat sa swerte samtang wala ka’y gibuhat. Andama ang imong kaugalingon. Pagkat-on. Pagtrabaho. Pag-uswag. Lig-ona ang imong kinaiya. Padayon sa paglakaw bisan pa og walay nakamatikod sa imong mga paningkamot.
Usahay, ang gitawag nila nga ‘swerte’ mao ang imong pagkaandam inig-abut sa tukmang higayon.
Ang tawo nga nangandam sulod sa daghang katuigan, lagmit magkinahanglan lamang og usa ka binta aron mausab ang tanan.
Ang usa ka oras mahimong moabli og usa ka pultahan.
Ang usa ka hukum mahimong makapausab sa imong kaugmaon.
Ang usa ka panagbagat mahimong makapaila kanimo sa usa ka tawo nga makapausab sa imong kinabuhi.
Ang usa ka oportunidad pwedeng magdala kanimo ngadto sa usa ka dapit nga wala nimo damha.
Ayaw Tugoti nga Ilogon sa Kahadlok ang Imong Higayon
Kung moabut na gayud ang imong takna, ayaw tugoti nga kabigon ka sa kahadlok nga dili ka pa andam.
Tingali mobati ka og pagpanagana. Tingali kulbaan ka. Tingali makapangutana ka sa imong kaugalingon kung kaya ba gayud nimo.
Lakang lang gihapon.
Walay tibuuk panahon diin dili ka makabatyag og kahadlok o pagduhaduha. Usahay, ang kaisug nagpasabut lang nga mopadayon ka bisan pa og nagkurog ang imong kasingkasing.
Kung moabli ang pultahan sa kahigayonan, ayaw pag-ukon-ukon, lakaw latas niini.
Padayon sa Paglakaw
Ug unsa man kung wala pa moabut ang imong takna?
Padayon lang.
Padayon sa pagtoo.
Padayon sa pagpaningkamot.
Padayon sa paglaum.
Ang imong kapit-os sa pagkakaron dili sabton nga maoy magbuut sa imong kaugmaon.
Ang labing mangiub nga kagabhion dili molungtad sa kahangtoran. Ang labing pit-os nga kahimtang molabay ra gihapon sa kaulahian. Ang tawo nga magpadayon sa paglakaw taliwala sa kalisdanan, sa kaulahian makadiskobre nga ang iyang gisubay diay nagpaingon sa usa ka maanindot nga padulngan.
Basin ugma mao na ang imong adlaw.
Basin sa sunod semana.
Basin sa sunod tuig.
Wala ka kahibalo kung kanus-a moabut ang imong takna—apan mao gayud kana ang hinungdan nganong dili ka angay mohunong.
Ang Imong Swerte Basin Mas Duol Pa Kay sa Imong Gidahom
Ayaw gayud ipakaubus ang gahum sa usa ka takna.
Ang usa ka takna mahimong makausab sa imong kahimtang. Ang usa ka takna mahimong makausab sa padulngan sa imong kinabuhi. Ang usa ka takna mahimong maghatag kanimo sa kahigayonan nga imong ginahulat sa tibuuk kinabuhi.
Busa, kung mamahimong lisud ang kinabuhi, hinumdumi kini:
Hayan usa na lang ka tipik ang imong gilay-on gikan sa hingpit nga kausaban sa kaugmaon.
Ayaw pag lunga tungud kay pit-os ang karon.
Ayaw pag-undang tungud kay ang imong mga damgo mas dugay kaysa gidahom.
Ayaw hunahunaa nga milabay na ang imong higayon.
Padayon sa pag andam sa imong kaugalingon.
Padayon sa pag abante.
Ug kung moabut na gayud ang takna sa swerte, dawata kini uban sa kaisug, pagpasalamat, ug pagtoo.
∼ο∼